Posts
ലൂസിഫര്‍
വരിക വരിക എന്നിരകളെ
വലകെട്ടി നേരമേറെയായി
കാത്തുകാത്തിരിയ്ക്കുന്നു
നിങ്ങള്‍ തന്‍ വരവിനായി
കത്തും വയറോടെ, ഞാന്‍.
നിങ്ങളറിയുക വലകെട്ടി
ചതിയിലൂടെയല്ലാതിരതേടാറി-
ല്ലൊരിയ്ക്കലും, അതുമത്രമേ
മാര്‍ഗ്ഗമേതുമുള്ളു, ദുര്‍ബ്ബലന്‍
ഞാനെന്നറിയുക, പൊറുക്കുക
നിങ്ങളെന്നോട്.
കത്തും വിശപ്പടക്കാനല്ലാതി-
രതേടാറില്ലൊരിയ്ക്കലും
ഇല്ല, വില്‍ക്കില്ലെന്‍ പൈതൃകവും
മാതൃത്വവും പാതിവ്രത്യവും.
വലകെട്ടില്ല ഞാനിരകളാ-
ക്കാനീ നാടിന്‍ നിസ്സഹായതയെ,
ബലിനല്‍കില്ലെന്‍ സഹ-
ജീവികളെ തുഛമാം നാണയ-
തുട്ടിന്‍കിലുക്കത്തില്‍,
ഇല്ല, അഴിയ്ക്കില്ലീ നാടിന്‍
താരുണ്യത്തിന്‍ മടിക്കുത്തൊരു
നിശാനൃത്തശാലയിലും വിടന്മാര്‍.
അറിയുക,
ഞാനിരതേടുന്നതെന്‍ കത്തും
വിശപ്പടക്കാനല്ലോ,
പൊറുക്കുക
വലകെട്ടിയല്ലാതിരതേടാ-
നാവില്ലെനിയ്ക്ക്,
ഞാന്‍ ദുര്‍ബ്ബലന്‍.
